Tokke kommune har 2300 inb. og eit areal på 980 km2. Lågaste punktet er Bandak på 72 m.o.h. og høgaste punkt er Kvannfjellet på 1537 m.o.h. Kommunen ligg i Vest-Telemark og grensar til kommunane: Vinje, Kviteseid, Fyresdal og Valle/ Bykle i Setesdalen. Kommunen ligg i nordenden av Telemarks-kanalen om lag midt mellom Oslo og Stavanger.
Tokke kommune har tradisjon med industri og eksport med brynestein heilt frå viking-tida. Kopargruvene på Åmdals Verk var i drift frå 1500-talet og heilt fram til 2. verdskrig.
Jordbruk og Skogbruk har lange tradisjonar i kommunen og er framleis ei viktig næring.
Kraftutbygginga på 50-60-talet har gjeve gode inntekter slik at kommunen har kunna byggje ut eit godt tenestetilbod. I dag er kommunen ein moderne industri- og jordbrukskommune med veksande reiseliv.
Kommunesenteret Dalen, med eventyrhotellet Dalen Hotel ( frå 1892 ), er prega av industriverksemder og handel/ tenesteytande verksemder.
I Tokke er det godt å bu for alle. Desentralisert tenestetilbod som skular, barnehagar og eldreomsorg kopla mot industri og reiseliv gjer det godt å vere Tokke-buar. Vil du bu i sentrumsnær leilegheit, eige hus med romsleg tomt eller småbruk så kan det vere Tokke du ser etter.